દેશભક્તિના રંગે રંગાયું અંકલેશ્વર ONGC; ધામધૂમથી મનાવાયો 80મો સ્વતંત્રતા દિવસ

અંકલેશ્વર ONGC ખાતે 80મા સ્વતંત્રતા દિવસની ભવ્ય ઉજવણી દેશભક્તિ અને રાષ્ટ્રગૌરવનો ત્રિવેણી સંગમ

અંકલેશ્વર સ્થિત ONGC (તેલ અને કુદરતી વાયુ નિગમ) પરિસરમાં 80મા સ્વતંત્રતા દિવસની અત્યંત ધામધૂમ અને દેશભક્તિસભર માહોલમાં ભવ્ય ઉજવણી કરવામાં આવી હતી. 

સમગ્ર સંકુલ રંગબેરંગી રોશની, ફુગ્ગાઓ અને તિરંગાના રંગોથી સજ્જ થઈ ઊઠ્યું હતુ.

કાર્યક્રમની શરૂઆત સંસ્થાનના ઉચ્ચ અધિકારીઓના હસ્તે સન્માનપૂર્વક રાષ્ટ્રધ્વજ તિરંગો લહેરાવીને કરવામાં આવી હતી. ત્યારબાદ ઉપસ્થિત તમામ લોકોએ એકસૂરે રાષ્ટ્રગાન ગાઈને મા ભોમ પ્રત્યે આદર વ્યક્ત કર્યો હતો.

 

ONGCના સુરક્ષા બળો અને CISFના જવાનો દ્વારા પ્રભાવશાળી પરેડ યોજી રાષ્ટ્રધ્વજને સલામી આપવામાં આવી હતી.

ONGC કેન્દ્રિય વિદ્યાલયના વિદ્યાર્થીઓ તેમજ કર્મચારીઓના પરિવારજનો દ્વારા દેશભક્તિના ગીતો, લોકનૃત્યો અને નાટકોની રજૂઆત કરવામાં આવી હતી, જેણે સમગ્ર વાતાવરણને દેશભક્તિના રંગે રંગી દીધું હતું. સંસ્થામાં ઉત્કૃષ્ટ કામગીરી કરનાર કર્મચારીઓ તેમજ શૈક્ષણિક અને રમતગમત ક્ષેત્રે વિશિષ્ટ સિદ્ધિ મેળવનાર બાળકોને સન્માનિત કરવામાં આવ્યા હતા.

આ પ્રસંગે ONGCના વરિષ્ઠ અધિકારીઓએ ઉપસ્થિત જનમેદનીને સંબોધતા દેશની આઝાદી માટે પ્રાણ ન્યોછાવર કરનાર વીર શહીદોને શ્રદ્ધાંજલિ અર્પણ કરી હતી. સાથે જ દેશની ઉર્જા સુરક્ષામાં અંકલેશ્વર ONGCના અવિરત યોગદાન અને ભવિષ્યના લક્ષ્યાંકો વિશે પ્રકાશ પાડ્યો હતો.

કાર્યક્રમમાં ONGCના અધિકારીઓ, કર્મચારીઓ, શ્રમિક સંઘોના પ્રતિનિધિઓ, તેમના પરિવારજનો અને સ્થાનિક નાગરિકો મોટી સંખ્યામાં ઉપસ્થિત રહ્યા હતા. કાર્યક્રમના અંતે સૌને મીઠાઈ વહેંચીને આઝાદીના આ મહાપર્વની ખુશીઓ વ્યક્ત કરવામાં આવી હતી.

#ગુજરાત ની પરછાઈ