ખારવા પંચ યુવા સમિતિ દ્વારા ૭૦થી વધુ તેજસ્વી વિદ્યાર્થીઓ અને શિક્ષકોનું વિશિષ્ટ સન્માન

ભરૂચના વેજલપુર ખાતે ખારવા પંચ યુવા સમિતિ દ્વારા તેજસ્વી તારલાઓનો ઇનામ વિતરણ અને ભવ્ય સન્માન સમારોહ યૉજાયો 

રિપોર્ટર, પિયુષ મિસ્ત્રી 

ધારાસભ્ય રમેશભાઈ મિસ્ત્રી, ટ્રસ્ટીગણ અને સામાજિક અગ્રણીઓની ઉપસ્થિતિમાં ૭૦થી વધુ તેજસ્વી વિદ્યાર્થીઓનું બહુમાન કરાયું; નિવૃત્ત શિક્ષકોનું પણ વિશિષ્ટ સન્માન

સમાજમાં શિક્ષણનો વ્યાપ વધે અને યુવા પ્રતિભાઓને પ્રોત્સાહક મંચ મળે તેવા શુભ આશય સાથે ખારવા પંચ વેજલપુર ભરૂચ પ્રેરિત યુવા સમિતિ દ્વારા શૈક્ષણિક વર્ષ ૨૦૨૬ના ઉત્કૃષ્ટ પરિણામ મેળવનાર વિદ્યાર્થીઓ માટે "ઇનામ વિતરણ તથા સન્માન સમારોહ - ૨૦૨૬" નું અત્યંત ભવ્ય અને પ્રેરણાદાયી આયોજન કરવામાં આવ્યું હતું.

આ સન્માન સમારોહમાં ધોરણ ૧૦ અને ૧૨ માં ૭૦% કે તેથી વધુ ગુણ મેળવનાર, તેમજ સ્નાતક, અનુસ્નાતક અને વ્યાવસાયિક કોર્સ સફળતાપૂર્વક પૂર્ણ કરનાર વેજલપુર અને આસપાસના સોસાયટી વિસ્તારના ખારવા, હાંસોટી અને માછી સમાજના ૭૦ જેટલાં ઉત્સાહી વિદ્યાર્થીઓએ ભાગ લીધો હતો.

કાર્યક્રમમાં ખાસ ઉપસ્થિત ભરૂચના લોકપ્રિય ધારાસભ્ય રમેશભાઈ મિસ્ત્રી, પંચના ટ્રસ્ટીગણ તેમજ સામાજિક કાર્યકરોએ વિદ્યાર્થીઓને શૈક્ષણિક પ્રગતિ માટે પ્રેરક માર્ગદર્શન પૂરું પાડી તેમનો ઉત્સાહ બેવડાવ્યો હતો. 

આ પ્રસંગે સમાજમાં શિક્ષણની જ્યોત પ્રજ્વલિત રાખનાર કાર્યરત શિક્ષકો તેમજ દીર્ઘ સેવા આપનાર નિવૃત્ત શિક્ષકોનું પણ સમાજ તરફથી શાલ અને મોમેન્ટો અર્પણ કરી વિશેષ સન્માન કરવામાં આવ્યું હતું.

સમારોહ દરમિયાન વિવિધ કેટેગરીમાં પ્રથમ, દ્વિતીય અને તૃતીય ક્રમાંકે ઉત્કૃષ્ટ પ્રદર્શન કરનાર ૨૩ જેટલાં ટોપર વિદ્યાર્થીઓને આકર્ષક ઇનામો, વિશિષ્ટ ભેટ અને યાદગાર મોમેન્ટો આપીને બિરદાવવામાં આવ્યા હતા. 

આ સાથે જ ભાગ લેનાર તમામ તેજસ્વી વિદ્યાર્થીઓને પ્રોત્સાહક સન્માન પત્ર આપી તેમનું ગૌરવ વધારવામાં આવ્યું હતું. 

યુવા સમિતિના આ ભગીરથ અને સફળ આયોજનને સમગ્ર સમાજના અગ્રણીઓએ મુક્ત મને બિરદાવી બિરુદ આપ્યું હતું.

#ગુજરાત ની પરછાઈ