ભરૂચની દારુલ ઉલૂમ માટલીવાલા મદ્રેસામાં અભ્યાસ કરતા બે યુવાનોની સીધી સંડોવણી ખુલી

ATS તપાસમાં ચોંકાવનારું ‘ભરૂચ કનેક્શન’: દારુલ ઉલૂમ માટલીવાલા મદ્રેસાના ૨ યુવકો સહિત જૈશ-એ-મોહમ્મદના ૫ સાગરીતોની ધરપકડ

ગુજરાત એન્ટી ટેરરિસ્ટ સ્ક્વોડ (ATS) દ્વારા જૈશ-એ-મોહમ્મદના દેશવિરોધી કાવતરાના કેસમાં કરવામાં આવેલી વધુ ૫ આરોપીઓની ધરપકડમાં એક મોટું અને ચોંકાવનારું 'ભરૂચ કનેક્શન' સપાટી પર આવ્યું છે. ભરૂચ સ્થિત એક જાણીતી મદ્રેસામાં અભ્યાસ કરતા બે યુવાનો આ આતંકી મોડ્યુલ સાથે સીધા સંકળાયેલા હોવાનો પર્દાફાશ થતાં સુરક્ષા એજન્સીઓ અને સ્થાનિક પોલીસ તંત્ર દોડતું થઈ ગયું છે.

દારુલ ઉલૂમ માટલીવાલા મદ્રેસાના ૨ વિદ્યાર્થીઓની અટકાયત

ATSની ઊંડાણપૂર્વકની તપાસમાં ભરૂચની દારુલ ઉલૂમ માટલીવાલા મદ્રેસા શંકાના દાયરામાં આવી છે. આ મદ્રેસામાં અભ્યાસ કરતા અને આતંકી વિચારધારાથી પ્રભાવિત થઈને દેશવિરોધી પ્રવૃત્તિઓમાં સંડોવાયેલા બે મુખ્ય યુવકોની એટીએસ દ્વારા અટકાયત કરવામાં આવી છે. પકડાયેલા આરોપીઓની ઓળખ નીચે મુજબ થઈ છે.

મોહમ્મદ ઐયુબ સુણસરા ઉર્ફે મોહમ્મદ ખળી (ઉંમર ૨૦ વર્ષ): ભરૂચની દારુલ ઉલૂમ માટલીવાલા મદ્રેસા સાથે સંકળાયેલો છે.

મોહમદ હસન હનીફ કરડીયા ઉર્ફે હસન હૈદરપુરી (ઉંમર ૨૦ વર્ષ): આ આરોપી પણ ભરૂચની આ જ મદ્રેસા સાથે સંકળાયેલો છે અને દેશવિરોધી કાવતરામાં તેની સક્રિય ભૂમિકા હોવાનું સામે આવ્યું છે.

UAPA (ગેરકાયદેસર પ્રવૃત્તિઓ પ્રતિબંધક કાયદો) હેઠળ નોંધાયેલા આ ગુનાની તપાસમાં બહાર આવ્યું છે કે પ્રતિબંધિત આતંકવાદી સંગઠન જૈશ-એ-મોહમ્મદની કટ્ટરપંથી વિચારધારાનો પ્રચાર-પ્રસાર કરવા માટે ભરૂચ કનેક્શનનો ઉપયોગ થઈ રહ્યો હતો. આરોપીઓ સ્થાનિક સ્તરે યુવાનોનું બ્રેઈનવોશ કરીને તેમને આતંકી નેટવર્કમાં જોડાવા માટે પ્રેરિત કરવાનો પ્રયાસ કરી રહ્યા હતા, જેથી ગુજરાતમાં જૈશનું એક મજબૂત નેટવર્ક ઊભું કરી શકાય.

ભરૂચ કનેક્શનની કડી મળતાં જ ગુજરાત ATS એ ટેકનિકલ સર્વેલન્સ અને ગુપ્ત માહિતીના આધારે ભરૂચ જિલ્લા પોલીસ અને અન્ય સુરક્ષા એજન્સીઓ સાથે સંકલન સાધીને ત્વરિત દરોડા પાડ્યા હતા. એજન્સીઓની સમયસરની સતર્કતાને કારણે ભરૂચ અને તેની આસપાસ આતંકી નેટવર્ક ફેલાવવાનું આ મોટું કાવતરું સમયસર નિષ્ફળ બનાવવામાં સફળતા મળી છે.

આ ચોંકાવનારા ખુલાસા બાદ ભરૂચ જિલ્લામાં તપાસ એજન્સીઓ દ્વારા ભારે સતર્કતા રાખવામાં આવી રહી છે. સુરક્ષા એજન્સીઓના મતે, દેશવિરોધી પ્રવૃત્તિઓ ને નેસ્તનાબૂદ કરવા માટે આ પ્રકારની કડક કાર્યવાહી ખૂબ જરૂરી હતી. સમયસર મળેલી ગુપ્ત માહિતી અને પોલીસ તંત્રની સક્રિય કામગીરીને કારણે ભરૂચમાંથી ઓપરેટ થતા આ સંભવિત આતંકી મોડ્યુલને મોટો ફટકો પડ્યો છે. હાલ પોલીસ અને ATS આ નેટવર્ક ભરૂચમાં કેટલું ઊંડું ઉતરેલું છે અને અન્ય કોણ આમાં સામેલ છે તેની સઘન તપાસ કરી રહી છે.

#ગુજરાત ની પરછાઈ