ભરૂચની જે.પી. કોલેજ ખાતે ભાજપ યુવા મોરચા નું ભવ્ય છાત્રા સંમેલન: ડૉ. શ્યામા પ્રસાદ મુખર્જીના વિચારોથી વિદ્યાર્થીઓને રાષ્ટ્રસેવાની પ્રેરણા અપાઈ

ભરૂચની જે.પી. કોલેજ ખાતે ભાજપ યુવા મોરચા દ્વારા ભવ્ય ‘છાત્રા સંમેલન’ યોજાયું

ડૉ. શ્યામા પ્રસાદ મુખર્જીના વિચારોમાંથી પ્રેરણા મેળવી વિદ્યાર્થીઓને રાષ્ટ્રસેવા અને દેશના વિકાસમાં સક્રિય યોગદાન આપવા કરાયું આહ્વાન

ભારતીય જનતા યુવા મોર્ચા (BJYM) ભરૂચ જિલ્લા દ્વારા આજે શહેરની નામાંકિત જે. પી. કોલેજ ખાતે એક ભવ્ય ‘છાત્રા સંમેલન’નું આયોજન કરવામાં આવ્યું હતું. આ કાર્યક્રમમાં મોટી સંખ્યામાં વિદ્યાર્થીઓ અને યુવા અગ્રણીઓ ઉત્સાહભેર સહભાગી થયા હતા.

સંમેલન દરમિયાન ભારતીય જનસંઘના સ્થાપક ડૉ. શ્યામા પ્રસાદ મુખર્જીના રાષ્ટ્રપ્રેમ, શિક્ષણ પ્રત્યેના સમર્પણ અને અખંડ ભારતના તેમના વિચારો વિશે વિદ્યાર્થીઓને વિસ્તૃત માર્ગદર્શન પૂરું પાડવામાં આવ્યું હતું. વક્તાઓએ જણાવ્યું હતું કે, ડૉ. મુખર્જીનું જીવન દેશના યુવાનો માટે દીવાદાંડી સમાન છે. તેમના આદર્શો અને જીવનમાંથી પ્રેરણા લઈ તમામ વિદ્યાર્થી મિત્રો રાષ્ટ્રસેવા, સમાજસેવા અને દેશના વિકાસમાં પોતાનું સક્રિય યોગદાન આપે તે માટે આ કાર્યક્રમ દ્વારા ખાસ હાકલ કરવામાં આવી હતી.

આ પ્રેરણાદાયી સંમેલનમાં ભાજપના વરિષ્ઠ હોદ્દેદારો તેમજ શૈક્ષણિક ક્ષેત્રના અગ્રણીઓ મંચસ્થ રહ્યા હતા, જેમાં ભારતસિંહ પરમાર (પૂર્વ મહામંત્રી, પ્રદેશ ભાજપા), પ્રકાશભાઈ મોદી (પ્રમુખ, જિલ્લા ભાજપા), રમેશભાઈ મિસ્ત્રી (ધારાસભ્ય, ભરૂચ), પરેશભાઈ પટેલ (મહામંત્રી, જિલ્લા ભાજપા), શક્તિસિંહ પરમાર (પ્રમુખ, જિલ્લા યુવા મોર્ચા), હેમદીપ પટેલ (મહામંત્રી, જિલ્લા યુવા મોર્ચા), ડૉ. એન. બી. પટેલ (પ્રિન્સિપાલ, જે. પી. કોલેજ) અને સમગ્ર કાર્યક્રમનું સંચાલન અને આયોજન યુવા મોર્ચાની ટીમ દ્વારા ખૂબ જ સુઆયોજિત રીતે કરવામાં આવ્યું હતું. ઉપસ્થિત તમામ મહાનુભાવોએ વિદ્યાર્થીઓને ઉજ્જવળ ભવિષ્ય અને રાષ્ટ્રનિર્માણના કાર્યો માટે શુભેચ્છાઓ પાઠવી હતી.

#ગુજરાત ની પરછાઈ