૧૭ વર્ષ બાદ ઐતિહાસિક જીત અપાવનાર જીગ્નેશ બ્રહ્મભટ્ટને વિપક્ષના નેતા બનાવવા વિવિધ સામાજિક જૂથોનું સમર્થન

સામાજિક સમર્થન અને બહોળા વહીવટી અનુભવના જોરે જીગ્નેશ બ્રહ્મભટ્ટ વિપક્ષના નેતા પદ માટે પ્રબળ દાવેદાર

આગામી વિધાનસભાની લડત માટે કૉંગ્રેસમાં રણનીતિ તેજ 

કૉંગ્રેસને હિન્દુ બહુલ વિસ્તારોમાં પુનઃ સંગઠિત કરવાની રજૂઆત

ભરૂચ નગરપાલિકા વિપક્ષના નેતા પદ માટે જીગ્નેશ બ્રહ્મભટ્ટના નામની પ્રબળ માંગ; કૉંગ્રેસને હિન્દુ બહુલ વિસ્તારોમાં પુનઃ સંગઠિત કરવાની રજૂઆત

સ્થાનિક સ્વરાજની ચૂંટણીઓ પૂર્ણ થયા બાદ હવે ભરૂચ નગરપાલિકામાં વિરોધ પક્ષના નેતા (Leader of Opposition) પદને લઈને રાજકીય ગરમાવો આવી ગયો છે. વોર્ડ નંબર ૮ માંથી કૉંગ્રેસ પક્ષ તરફથી જંગી બહુમતીથી ચૂંટાઈ આવેલા વરિષ્ઠ અગ્રણી જીગ્નેશ બ્રહ્મભટ્ટને વિરોધ પક્ષના નેતા બનાવવામાં આવે તેવી માગ સાથે કૉંગ્રેસના સ્થાનિક કાર્યકરો અને વિવિધ સમાજો દ્વારા પક્ષના મોવડીમંડળ સમક્ષ રજૂઆત કરવામાં આવી રહી છે.

૧૭ વર્ષ બાદ કૉંગ્રેસનો ઐતિહાસિક વિજય અને બહોળો અનુભવ રાજકીય વર્તુળોમાં ચર્ચાતી વિગતો મુજબ, વોર્ડ નંબર ૮ એ હિન્દુ બહુલ મતદારો ધરાવતો વિસ્તાર છે, જ્યાં છેલ્લા ૧૭ વર્ષથી કૉંગ્રેસ પક્ષ જીત માટે મથી રહ્યો હતો. 

જોકે, આ વખતે જીગ્નેશ બ્રહ્મભટ્ટની લોકચાહના અને ૨૧ વર્ષના લાંબા જાહેર જીવનના અનુભવના આધારે પક્ષે અહીં ૨ બેઠકો પર ઐતિહાસિક વિજય મેળવ્યો છે. અગાઉ ભરૂચ નગરપાલિકાના પ્રમુખ તરીકે તેમજ વિવિધ મહત્વની સમિતિઓના ચેરમેન તરીકે નિઃસ્વાર્થ સેવાઓ આપી ચૂકેલા જીગ્નેશ બ્રહ્મભટ્ટ વહીવટી કાર્યશૈલીનો બહોળો અનુભવ ધરાવે છે.

સંગઠનને મજબૂત કરવા અને વિધાનસભા ચૂંટણીના લક્ષ્યાંક સાથે દાવેદારી સ્થાનિક સમર્થકો અને પક્ષના કાર્યકરોનું માનવું છે કે જો જીગ્નેશ બ્રહ્મભટ્ટને વિરોધ પક્ષના નેતા તરીકેની જવાબદારી સોંપવામાં આવે, તો આગામી સમયમાં કૉંગ્રેસ પક્ષ શહેરના અન્ય હિન્દુ બહુલ વોર્ડ (જેવા કે વોર્ડ નંબર ૩, ૪, ૫, ૬, ૭, ૯ અને ૧૧) માં પણ સંગઠનાત્મક દ્રષ્ટિએ વધુ સક્રિય અને મજબૂત બની શકે છે.

આ ઉપરાંત, સ્થાનિક સ્તરે ઘાંચી સમાજ અને ગોલા સમાજ સહિતના વિવિધ સામાજિક જૂથોમાંથી ૫૦૦ થી ૧૦૦૦ જેટલા નવા અને ઉત્સાહી કાર્યકરો પક્ષ સાથે જોડાય તેવી પૂરેપૂરી સંભાવનાઓ વ્યક્ત કરવામાં આવી રહી છે. કાર્યકરો વતી પક્ષના ઉચ્ચ નેતૃત્વને વિનંતી કરવામાં આવી છે કે આ એક સાનુકૂળ તક છે, જેનો યોગ્ય ઉપયોગ કરીને આગામી વિધાનસભા ચૂંટણીમાં સત્તાધારી ભાજપ સામે મજબૂત અને બરાબરીની ટક્કર ઝીલી શકાય તેમ છે.

પક્ષમાં નવા પ્રાણ ફૂંકાશે તેવી આશા પક્ષના સાચા સિપાહી તરીકે સ્થાનિક સ્તરેથી એવી પ્રબળ રજૂઆત થઈ રહી છે કે જીગ્નેશ બ્રહ્મભટ્ટના નેતૃત્વ અને માર્ગદર્શન હેઠળ ભરૂચ શહેર કૉંગ્રેસમાં નવા પ્રાણ ફૂંકાશે અને સંગઠન નવપલ્લવિત થશે. હવે જોવાનું એ રહે છે કે પક્ષનું હાઈકમાન્ડ આ જનભાવના અને રાજકીય સમીકરણોને ધ્યાનમાં રાખીને શું નિર્ણય લે છે.

#ગુજરાત ની પરછાઇ