સાયખા GIDC અને સારણની સીમમાં રાત્રિના 'કાળા ખેલ' પર આકસ્મિક દરોડા પાડવા સ્થાનિકોની ઉગ્ર માંગ

વાગરા પંથકમાં ખનન માફિયાઓ પર તંત્રનો હથોડો: વાવ ગામની સીમમાંથી ૨૦ લાખનો મુદ્દામાલ જપ્ત

હરિનગર બાદ વાવ વિસ્તારમાં મામલતદારની સરપ્રાઈઝ વિઝિટથી ફફડાટ; રોયલ્ટી પાસ વગર ૪૫ ટન માટી ભરેલું ડમ્પર ઝડપાયું

સાયખા GIDC અને સારણની સીમમાં ચાલતા રાત્રિના 'કાળા કારોબાર' પર દરોડા પાડવા સ્થાનિકોની ઉગ્ર માંગ; તંત્ર કરતાં માફિયાઓનું જાસૂસી નેટવર્ક વધુ તેજ હોવાનો ચોંકાવનારો ખુલાસો

વાગરા તાલુકામાં લાંબા સમયથી બેફામ બનેલા ખનન માફિયાઓ સામે આખરે સરકારી તંત્રે લાલ આંખ કરી છે. વાગરા પંથકમાં ગેરકાયદેસર રીતે વહન થતી ખનીજ સંપત્તિ પર રોક લગાવવા માટે તંત્ર દ્વારા કરવામાં આવેલી આ કડક કાર્યવાહી હાલ સમગ્ર પંથકમાં ભારે ચર્ચાનો વિષય બની છે. હરિનગર વિસ્તારમાં અગાઉ થયેલી કાર્યવાહી બાદ, હવે વાવ ગામની સીમમાં મામલતદારની ટીમે આકસ્મિક દરોડો પાડી લાખો રૂપિયાનો મુદ્દામાલ ઝડપી પાડતા ભૂમાફિયાઓમાં ફફડાટ વ્યાપી ગયો છે.

મળતી વિગતો અનુસાર, વાગરા મામલતદાર અને તેમની ટીમને બાતમી મળી હતી કે વાવ ગામની સીમમાંથી ગેરકાયદેસર રીતે માટીનું ખનન અને પરિવહન થઈ રહ્યું છે. આ બાતમીના આધારે અધિકારીઓએ વાવ વિસ્તારમાં સરપ્રાઈઝ ચેકિંગ હાથ ધર્યું હતું. તપાસ દરમિયાન રોયલ્ટી પાસ વગર ગેરકાયદેસર રીતે આશરે ૪૫ ટન જેટલી માટી ભરીને જઈ રહેલું એક હાઈવા ડમ્પર (નંબર: GJ-06-BX-9864) ઝડપાઈ ગયું હતું. તંત્રએ તાત્કાલિક ધોરણે આશરે રૂ. ૨૦ લાખની કિંમતનું ડમ્પર અને ખનીજ સહિતનો મુદ્દામાલ જપ્ત કર્યો હતો અને આગળની કાયદેસરની કાર્યવાહી તેમજ દંડની વસૂલાત માટે આ વાહન વાગરા પોલીસ સ્ટેશને સોંપવામાં આવ્યું છે.

સ્થાનિક સૂત્રોના જણાવ્યા અનુસાર, દિવસ દરમિયાન તંત્રની ભીંસ વધતા હવે અસલી ખેલ રાતના અંધકારમાં રમાઈ રહ્યો છે. વાગરાની ઔદ્યોગિક વસાહત ગણાતી સાયખા GIDC તેમજ સારણ ગામની સીમમાં રાત્રિના સમયે મોટા પાયે ગેરકાયદેસર માટી અને રેતી ખનનનું મસમોટું નેટવર્ક સક્રિય હોવાની વિગતો બહાર આવી છે. રાતના સમયે અહીથી સેંકડો ઓવરલોડ ડમ્પરો પસાર થાય છે, જેના કારણે સ્થાનિક રસ્તાઓ પણ બિસ્માર બન્યા છે. સ્થાનિક ગ્રામજનોમાં એવી પ્રબળ માંગ ઉઠી છે કે જો તંત્ર માત્ર દિવસ દરમિયાન જ નહીં, પરંતુ રાત્રિના સમયે પણ આકસ્મિક દરોડા પાડે તો કરોડો રૂપિયાની ખનીજ ચોરી અને આ કાળા કારોબાર પાછળ રહેલા મોટા માથાઓના પાપ છતા થઈ શકે તેમ છે.

આ સમગ્ર અહેવાલમાં સૌથી ચોંકાવનારો અને આંખ ઉઘાડનારો ખુલાસો એ થયો છે કે ખનન માફિયાઓનું નેટવર્ક સરકારી તંત્ર કરતાં પણ વધુ સ્પીડમાં કામ કરી રહ્યું છે. માફિયાઓએ હાઈવેથી લઈને ગામડાંઓની સીમ સુધીના મુખ્ય ત્રણ રસ્તા અને ચાર રસ્તાઓ પર પોતાના ખાસ 'વોચર્સ' (બાતમીદારો) બાઈક અને મોબાઈલ ફોન સાથે ગોઠવી રાખ્યા છે. સરકારી અધિકારીઓની ગાડી કે કોઈ પણ શંકાસ્પદ વાહન પંથકમાં પ્રવેશે કે તરત જ ગણતરીની સેકન્ડોમાં ખનન સ્થળ પર મેસેજ અથવા લોકેશન પહોંચી જાય છે. પરિણામે, અધિકારીઓ ઘટનાસ્થળે પહોંચે તે પહેલાં જ માફિયાઓ મશીનરી અને વાહનો લઈને રફુચક્કર થઈ જાય છે.

વાગરા પંથકની પ્રજા હવે આ ભૂમાફિયાઓના ત્રાસથી કંટાળી ગઈ છે. સ્થાનિકોનું કહેવું છે કે તંત્ર દ્વારા ક્યારેક-ક્યારેક કરવામાં આવતી આ કાર્યવાહી આવકારદાયક છે, પરંતુ ખનન પ્રવૃત્તિને જડમૂળથી નાબૂદ કરવા માટે આરપારની લડાઈ લડવી પડશે. દેખાડા પૂરતી કાર્યવાહી કરવાને બદલે ખનનના મુખ્ય કેન્દ્રો પર કાયમી વોચ રાખવામાં આવે અને જવાબદાર મોટા ગજાના તત્વો સામે કડક કાનૂની પગલાં ભરાય, તો જ વાગરાની કિંમતી ખનીજ સંપત્તિ લૂંટાતી બચાવી શકાશે.

#ગુજરાત ની પરછાઇ