સર્વાઇવલ ટેક્નોલોજીસમાં અચાનક ભીષણ આગ, શોર્ટ સર્કિટની આશંકા

અંકલેશ્વર GIDCની સર્વાઇવલ ટેક્નોલોજીસ કંપનીમાં ભીષણ આગ: ફાયર ફાઇટરોની ભારે જહેમત બાદ આગ પર કાબૂ

ડીપીએમસીના ફાયર ટેન્ડરોએ તાત્કાલિક મોરચો સંભાળ્યો સદનસીબે મોટી જાનહાનિ ટળી, શોર્ટ સર્કિટની આશંકા

અંકલેશ્વર ઔદ્યોગિક વસાહત (GIDC) માં આવેલી સર્વાઇવલ ટેક્નોલોજીસ લિમિટેડ કંપનીમાં ગતરોજ અચાનક ભીષણ આગ ફાટી નીકળતાં સમગ્ર વિસ્તારમાં ભારે અફરાતફરી અને દોડધામ મચી ગઈ હતી. ઘટનાની ગંભીરતાને જોતાં વહીવટી તંત્ર અને ફાયર વિભાગ તાત્કાલિક એક્શનમાં આવ્યું હતું.

આગ લાગવાની ઘટનાની જાણ થતાં જ ડીપીએમસી (DPMC) ના ફાયર ટેન્ડરો વિના વિલંબે ઘટના સ્થળે દોડી આવ્યા હતા. આગની તીવ્રતા ખૂબ જ વધારે હોવાના કારણે ફાયર વિભાગના જવાનોએ તાત્કાલિક મોરચો સંભાળી લીધો હતો.

આગને વધુ ફેલાતી અટકાવવા માટે ચારેય તરફથી સતત પાણીનો મારો ચલાવવામાં આવ્યો હતો. કલાકોની ભારે જહેમત અને કડક સંઘર્ષ બાદ ફાયર ફાઇટરો આગને કાબૂમાં લેવામાં સફળ રહ્યા હતા. મુખ્ય આગ પર કાબૂ મેળવ્યા બાદ પણ, ઘટના સ્થળે લાંબા સમય સુધી કૂલિંગની કામગીરી સતત ચાલુ રાખવામાં આવી હતી જેથી આગ ફરી ન ભડકે.

 શોર્ટ સર્કિટની આશંકા, જાનહાનિ ન થતાં તંત્રે લીધો રાહતનો શ્વાસ આ દુર્ઘટનામાં સૌથી મોટી અને રાહતની વાત એ રહી કે સમયસરના પગલાંને કારણે કોઈ પણ પ્રકારની જાનહાનિ થઈ નથી

 આગ લાગવાનું ચોક્કસ અને સત્તાવાર કારણ હજુ સુધી જાણી શકાયું નથી, પરંતુ પ્રાથમિક તપાસમાં આ દુર્ઘટના શોર્ટ સર્કિટના કારણે સર્જાઈ હોવાની પ્રબળ આશંકા વ્યક્ત કરવામાં આવી રહી છે.

આ ભીષણ આગના કારણે કંપનીના પ્લાન્ટ, મશીનરી અને અંદર રાખેલા કરોડોના માલસામાનને મોટા પાયે નુકસાન થયું હોવાનો અંદાજ છે. હાલ કંપની સત્તાધીશો દ્વારા માલસામાનના નુકસાનનું ચોક્કસ આકલન કરવાની પ્રક્રિયા ચાલી રહી છે.

બીજી તરફ, સુરક્ષા અને વહીવટી તંત્રના સંબંધિત વિભાગો દ્વારા આગ લાગવા પાછળના ચોક્કસ કારણો શોધવા માટે ઝીણવટભરી તપાસનો દોર શરૂ કરી દેવામાં આવ્યો છે.

#ગુજરાત ની પરછાઈ