GFLનું કેમિકલ વેસ્ટ રસ્તા પર વહાવવાની લાપરવાહી ભારે પડી; વાગરા પોલીસે ગુનો નોંધી તપાસ આદરી

વાગરામાં GFL કંપનીનું જોખમી કેમિકલ વેસ્ટ રસ્તા પર ઢોળાતાં પોલીસ એક્શનમાં, ટેન્કર ચાલક જેલભેગો

​જીવના જોખમે કેમિકલ પરિવહન કરતી કંપનીઓ સામે લાલઆંખ; વાગરા પોલીસે ગુનો નોંધી દાખલારૂપ કાર્યવાહી કરી

ઔદ્યોગિક ગઢ ગણાતા ભરૂચ જિલ્લાના વાગરા તાલુકામાંથી એક ચોંકાવનારો કિસ્સો સામે આવ્યો છે, જ્યાં માનવ જિંદગી અને પર્યાવરણને ગંભીર નુકસાન પહોંચાડી શકે તે રીતે કેમિકલ વેસ્ટનું જોખમી વહન કરવામાં આવી રહ્યું હતું. જોકે, વાગરા પોલીસ સ્ટેશનના જાગૃત જવાનોની સતર્કતાને કારણે એક મોટી દુર્ઘટના ટળી છે અને પોલીસે ટેન્કર ચાલક સહિત મુદ્દામાલ ઝડપી પાડી કાયદેસરની કાર્યવાહી હાથ ધરી છે.

​મળતી માહિતી મુજબ, ગત ૨૦ મે ૨૦૨૬ના રોજ સાંજના સમયે વાગરા પોલીસ સ્ટેશનના અનાર્મ હેડ કોન્સ્ટેબલ ભોપાભાઈ ગફુરભાઈ અને તેમની ટીમ ખાનગી વાહનમાં પખાજણ ગામથી વાગરા તરફ આવી રહ્યા હતા. આ દરમિયાન એચ.પી. પેટ્રોલ પંપથી જી.ઈ.બી ચોકડી વચ્ચેથી પસાર થઈ રહેલા એક અશોક લેલેન્ડ કંપનીના ટેન્કર (નંબર: GJ 18 BV 6699) ના પાછળના ભાગેથી કેમિકલ જેવું પ્રવાહી રસ્તા પર ઉભરાઈને ઢોળાતું તેમની નજરે પડ્યું હતું. પોલીસે તાત્કાલિક તત્પરતા દાખવી આ ટેન્કરને આંતરીને અટકાવ્યું હતું.

​તપાસ દરમિયાન માલૂમ પડ્યું કે ટેન્કરનો પાછળનો વાલ્વ ખુલ્લો રહી ગયો હતો અથવા યોગ્ય રીતે બંધ ન હોવાને કારણે અત્યંત જોખમી અને ભારે દુર્ગંધ મારતું કેમિકલ આખા હાઇવે પર વહી રહ્યું હતું. આ કેમિકલ માર્ગ પરથી પસાર થતા અન્ય વાહનચાલકો, રાહદારીઓ તેમજ પશુ-પંખીઓ માટે જીવલેણ સાબિત થઈ શકે તેમ હતું.

​પોલીસની કડક પૂછપરછમાં ટેન્કર ચાલકે કબૂલાત કરી હતી કે આ કેમિકલ વેસ્ટ દહેજ જી.આઈ.ડી.સી. સ્થિત પ્રખ્યાત ગુજરાત ફ્લોરો કેમિકલ લિમિટેડ (GFL) કંપનીમાંથી ભરવામાં આવ્યું હતું. આ જોખમી કેમિકલ વેસ્ટનો જથ્થો મહેસાણા જિલ્લાના જોટાણા ખાતે આવેલી અનમોલ એગ્રો કંપનીમાં ખાલી કરવા માટે લઈ જવામાં આવી રહ્યો હતો.

​વાગરા પોલીસે તાત્કાલિક ઘટનાસ્થળે પંચોને રૂબરૂ રાખીને કેમિકલના સેમ્પલ મેળવીને તેને સીલ કર્યા હતા. આ સાથે જ પોલીસે આશરે રૂપિયા 5 લાખની કિંમતનું ટેન્કર અને કેમિકલનો મુદ્દામાલ જપ્ત કર્યો છે.

​આ ગંભીર બેદરકારી બદલ ટેન્કર ચાલક શિવશંકર દેવીદયાલ પાલ (રહે. હાલ છત્રાલ જી.આઈ.ડી.સી., મૂળ ઉત્તર પ્રદેશ) ની અટકાયત કરવામાં આવી છે અને તેની વિરૂદ્ધ ભારતીય નાગરિક સુરક્ષા સંહિતા તેમજ બી.એન.એસ. (BNS) ની કલમ ૨૮૬ અને ૧૨૫ હેઠળ વાગરા પોલીસ મથકે ગુનો નોંધી જેલભેગો કરવામાં આવ્યો છે. આ મામલે હેડ કોન્સ્ટેબલ સુરેશજી હેમરાજજી ઠાકોર આગળની તપાસ ચલાવી રહ્યા છે.

#ગુજરાતનીપરછાઈ