સિલ્વર જ્યુબિલી વટાવી બિનહરીફની પરંપરા 26માં વર્ષમાં પ્રવેશી: પાનોલી મંડળમાં નવો ઈતિહાસ

પાનોલી ઇન્ડસ્ટ્રીઝ એસોસિએશનમાં એકતાના દર્શન: સતત 26માં વર્ષે ચૂંટણી બિનહરીફ

ઉદ્યોગકારોએ પ્રમુખ બી. એસ. પટેલ અને મંત્રી કિરણસિંહ પરમારની ટીમ પર ફરી વિશ્વાસ મૂક્યો: જનરલ અને રિઝર્વ કેટેગરીની તમામ બેઠકો બિનહરીફ જાહેર

પાનોલી ઇન્ડસ્ટ્રીઝ એસોસિએશન (PIA) એ ફરી એકવાર સમગ્ર રાજ્યના ઉદ્યોગ મંડળો માટે એકતાનું ઉદાહરણ પૂરું પાડ્યું છે. વર્ષ 2026-27 ની કારોબારી સમિતિના સભ્યોની ચૂંટણીમાં એક પણ હરીફ ઉમેદવાર ન આવતા, સતત 26માં વર્ષે પાનોલી ઉદ્યોગ મંડળની ચૂંટણી બિનહરીફ જાહેર કરવામાં આવી છે.

મંડળના પ્રમુખ બી. એસ. પટેલ અને માનદ મંત્રી કિરણસિંહ પરમારની આગેવાની હેઠળની ટીમે છેલ્લા કેટલાક વર્ષોમાં ઉદ્યોગકારોના હિતમાં અને પાનોલી જીઆઈડીસીના વિકાસ માટે અનેક મહત્વના કાર્યો કર્યા છે. આ યશસ્વી કામગીરીને પગલે ઉદ્યોગકારોમાં વ્યાપક સંતોષ જોવા મળી રહ્યો છે, જેના પરિણામે તમામ સભ્યોએ વર્તમાન ટીમમાં પોતાનો અડગ વિશ્વાસ વ્યક્ત કર્યો છે.

આ વર્ષે જનરલ કેટેગરીની 7 બેઠકો અને રિઝર્વ કેટેગરીની 2 બેઠકો માટે ચૂંટણી પ્રક્રિયા હાથ ધરવામાં આવી હતી. જોકે, ફોર્મ ભરવાના અંતિમ દિવસ સુધી નિર્ધારિત સંખ્યામાં જ ઉમેદવારી ફોર્મ ભરાતા ચૂંટણી સમિતિ દ્વારા તમામ સભ્યોને બિનહરીફ વિજેતા જાહેર કરાયા છે.

બિનહરીફ વરાયેલા પ્રતિનિધિઓની યાદી

● જનરલ કેટેગરી (ત્રણ વર્ષની મુદત માટે)

 1. કિરણસિંહ પી. પરમાર (ગુજરાત કેમીકલ કોર્પોરેશન)

 2. મેહબુબભાઈ એ. ફીજીવાલા (નુથર્મ સ્ટાયરો પેક પ્રા.લી.)

 3. પંકજભાઈ એ. ભરવાડા (પરમ કેમીકલ્સ પ્રા.લી.)

 4. કરન એમ. જોલી (પ્રોલાઈફ બાયો કેમીકલ ઇન્ડસ્ટ્રીઝ પ્રા.લી.)

 5. દીલીપ બી. જીયાની (શ્રીનાથ એન્ટરપ્રાઇઝ)

 6. પરેશ એમ. આસલોટ (કોસ્કેમ ઇન્ડસ્ટ્રીઝ)

● જનરલ કેટેગરી (એક વર્ષની મુદત માટે)

 હેમન્તભાઈ ડી. પટેલ (રીદ્ધી લાઈફ કેર)

● રિઝર્વ કેટેગરી (ત્રણ વર્ષની મુદત માટે)

વિનોદ જોષી (નીયમ ઇન્ડસ્ટ્રીઝ)

પાનોલી ઉદ્યોગ મંડળના સભ્યો દ્વારા જે રીતે એકતા અને સહકારની ભાવના દર્શાવવામાં આવી છે, તેનાથી પાનોલી જીઆઈડીસીના વિકાસને વધુ વેગ મળશે તેવો આશાવાદ ઉદ્યોગ અગ્રણીઓએ વ્યક્ત કર્યો છે. આ બિનહરીફ વરણીને ઉદ્યોગ જગતે આવકારી નવી ટીમને શુભેચ્છાઓ પાઠવી છે.

#ગુજરાત ની પડછાઈ