આંગણવાડી બહેનોનો ઓનલાઈન કામનો બહિષ્કાર, હવે અચોક્કસ મુદતની હડતાલની ચીમકી

 ૧.૪૦ લાખ આંગણવાડી બહેનોનો હુકાર: ૧૭ માર્ચથી રાજ્યભરની આંગણવાડીઓને લાગશે તાળા

રાજ્યની આંગણવાડી કાર્યકર અને તેડાગર બહેનોએ પોતાની પડતર માંગણીઓને લઈને સરકાર સામે આરપારની લડાઈના મંડાણ કર્યા છે. પગાર વધારા અને નવા મોબાઈલ ફોન સહિતના પ્રશ્નોનું નિરાકરણ ન આવતા આગામી ૧૭/૦૩/૨૦૨૬ થી રાજ્યભરની ૧.૪૦ લાખ આંગણવાડીઓને તાળા મારવાની ચીમકી ઉચ્ચારવામાં આવી છે. હાલમાં જ બહેનોએ તમામ ઓનલાઈન કામગીરીનો બહિષ્કાર કરી વિરોધ નોંધાવ્યો છે.

વચનો અધૂરા: ૨૦૨૨ થી મોબાઈલની રાહ

વર્ષ ૨૦૨૨માં રાજ્ય સરકાર દ્વારા આંગણવાડી બહેનોને નવા સ્માર્ટફોન આપવાનું વચન આપવામાં આવ્યું હતું. જોકે, ત્રણ વર્ષ વિતવા છતાં હજુ સુધી નવા ફોન મળ્યા નથી. જૂના મોબાઈલ ફોન વારંવાર હેંગ થતા હોવાથી અને ટેકનિકલ ખામીઓને કારણે ઓનલાઈન એન્ટ્રી કરવી મુશ્કેલ બની છે. ગામડાઓમાં નેટવર્કના ધાંધિયા અને નબળી એપ્લિકેશનને કારણે બહેનોમાં ભારે રોષ જોવા મળી રહ્યો છે.

મુખ્ય માંગણીઓ પર એક નજર

 * પગાર વધારો: મોંઘવારીના સમયમાં સન્માનજનક વેતન આપવામાં આવે.

 * નવા સ્માર્ટફોન: ટેકનિકલ કામગીરી માટે તાત્કાલિક નવા હેન્ડસેટની ફાળવણી.

 * પડતર પ્રશ્નો: કુલ ૧૨ જેટલી પડતર માંગણીઓનો તાકીદે સ્વીકાર.

 * ઓનલાઈન કામગીરી: જ્યાં સુધી સાધનો ન મળે ત્યાં સુધી ઓનલાઈન કામનું ભારણ દૂર કરવું.

અચોક્કસ મુદતની હડતાલની તૈયારી

જો ૧૭ માર્ચ સુધીમાં સરકાર દ્વારા કોઈ સકારાત્મક નિર્ણય લેવામાં નહીં આવે, તો આંગણવાડી બહેનો અને આશા વર્કરો રસ્તા પર ઉતરી આવશે અને અચોક્કસ મુદતની હડતાલ પર ઉતરી જશે. આ હડતાલને કારણે બાળકોના પોષણ અને રસીકરણ જેવી પાયાની સેવાઓ ખોરવાઈ જવાની ભીતિ સેવાઈ રહી છે. 

"સરકાર માત્ર ડિજિટલ ઇન્ડિયાની વાતો કરે છે, પણ અમને કામ કરવા માટે જરૂરી સાધનો પણ આપતી નથી. હવે લડી લેવાના મૂડમાં છીએ." — આંગણવાડી કર્મચારી મંડળ

#ગુજરાત ની પડછાઈ