ભાજપના નેતાઓ શિરીષ બંગાળી અને પ્રજ્ઞેશ મિસ્ત્રીની બેવડી હત્યાના કેસમાં નેશનલ ઈન્વેસ્ટિગેશન એજન્સી (NIA) દ્વારા મોટી કાર્યવાહી હાથ ધરાઈ

ભરૂચમાં 2015માં થયેલી ભાજપના નેતાઓ શિરીષ બંગાળી અને પ્રજ્ઞેશ મિસ્ત્રીની બેવડી હત્યાના કેસમાં નેશનલ ઈન્વેસ્ટિગેશન એજન્સી (NIA) દ્વારા મોટી કાર્યવાહી હાથ ધરવામાં આવી

આ કેસના આરોપી યુનુસ શેખ ઉર્ફે યુનુસ માંજરાની મિલકતને અમદાવાદની NIA વિશેષ કોર્ટના આદેશથી ટાંચમાં લઈ સીલ કરી દેવામાં આવી છે. આ કાર્યવાહીથી સ્થાનિક કક્ષાએ ભારે ચર્ચા જાગી છે.

હત્યાનો ઘટનાક્રમ અને આરોપીઓ

2 નવેમ્બર, 2015ના રોજ ભરૂચ જિલ્લા ભાજપના પૂર્વ પ્રમુખ શિરીષ બંગાળી અને ભાજપ યુવા મોરચાના મહામંત્રી પ્રજ્ઞેશ મિસ્ત્રીની ગોળી મારીને હત્યા કરવામાં આવી હતી. આ ઘટના ભરૂચના સેવાશ્રમ રોડ પર આવેલી 'સૂર્યા પ્રિન્ટિંગ પ્રેસ'માં બની હતી. તપાસમાં સામે આવ્યું હતું કે આ હત્યા અંડરવર્લ્ડ ડોન દાઉદ ઇબ્રાહિમના સાગરીત જાવેદ ચીકનાના ઈશારે થઈ હતી. તેમણે હિન્દુ નેતાઓની હત્યા માટે 50 લાખ રૂપિયાની સોપારી આપી હતી.

આ કેસમાં NIA દ્વારા અત્યાર સુધીમાં 11 આરોપીઓની ધરપકડ કરવામાં આવી છે, જે હાલ જેલમાં છે. આ ઉપરાંત, એક આરોપી હજી પણ વોન્ટેડ છે, જ્યારે એકનું મૃત્યુ થયું છે.

NIAની કાર્યવાહી

NIAની ટીમે અમદાવાદની વિશેષ કોર્ટના આદેશ બાદ ભરૂચના સોનેરી મહેલ વિસ્તારમાં આરોપી યુનુસ શેખની મિલકત સીલ કરી દીધી છે. આ કાર્યવાહી અંડરવર્લ્ડ સાથે સંકળાયેલા ગુનાહિત તત્વો સામે કડક પગલાં ભરવાનો સંકેત આપે છે. આ ડબલ મર્ડર કેસમાં 11 આરોપીઓની ધરપકડ બાદ પણ તપાસ ચાલુ રહી હતી, જેના ભાગરૂપે હવે આરોપીઓની મિલકતોને ટાંચમાં લેવાની કાર્યવાહી હાથ ધરવામાં આવી છે.

અંડરવર્લ્ડ અને રાજકીય કનેક્શન

પોલીસ અને NIAની તપાસમાં એવું બહાર આવ્યું છે કે દાઉદ ઇબ્રાહિમના સાગરીત જાવેદ ચીકનાએ ભરૂચ અને સુરતમાં સક્રિય એક અંડરવર્લ્ડ મોડ્યુલ દ્વારા આ હત્યાનું ષડયંત્ર રચ્યું હતું. આ મોડ્યુલે ચાર હિન્દુ નેતાઓને ટાર્ગેટ કરવા માટે નામ નક્કી કર્યા હતા, જેમાંથી શિરીષ બંગાળી અને પ્રજ્ઞેશ મિસ્ત્રીની હત્યા કરવામાં આવી હતી. આ ઘટનાએ તે સમયે રાજકીય અને સુરક્ષા વર્તુળોમાં ભારે હલચલ મચાવી હતી.

#gujaratniparchhai