વેજલપુરમાં કિન્નર સમાજના અગ્રણીના અધ્યક્ષસ્થાને RSSનો વિજયાદશમી ઉત્સવ અને શસ્ત્રપૂજન કાર્યક્રમ યોજાયો

ભરૂચના વેજલપુરમાં કિન્નર સમાજના અગ્રણીના અધ્યક્ષસ્થાને RSSનો વિજયાદશમી ઉત્સવ અને શસ્ત્રપૂજન કાર્યક્રમ 

રિપોર્ટર,પિયુષમિસ્ત્રી 

 રાષ્ટ્રીય સ્વયંસેવક સંઘ (RSS)ના શતાબ્દી વર્ષની ઉજવણીના ભાગરૂપે આજે ભરૂચ શહેરના પશ્ચિમ વિસ્તાર વેજલપુરમાં વિવેકાનંદ પ્રભાત શાખા દ્વારા ભવ્ય વિજયાદશમી ઉત્સવનું આયોજન કરવામાં આવ્યું હતું. 

આ કાર્યક્રમની સૌથી મોટી વિશેષતા એ હતી કે તેનું અધ્યક્ષસ્થાન વેજલપુર વિસ્તારના કિન્નર સમાજના અગ્રણી શ્રી દીપાકુંવર માસીએ શોભાવ્યું હતું, જે સામાજિક સમરસતાનું ઉત્તમ ઉદાહરણ પૂરું પાડે છે.

પથ સંચલન અને શસ્ત્રપૂજનનો કાર્યક્રમ RSSની સ્થાપનાના આ પવિત્ર દિવસ નિમિત્તે વેજલપુરની ૧૯૮૧થી કાર્યરત પ્રભાત શાખામાં સંઘની પ્રથા મુજબ કાર્યક્રમની શરૂઆત થઈ હતી.

 * પથ સંચલન: કિન્નર અગ્રણી દીપાકુંવર માસીની ઉપસ્થિતિમાં આયોજિત આ કાર્યક્રમમાં આશરે ૧૦૦ જેટલા સ્વયંસેવકોએ ભાગ લીધો હતો અને વિસ્તારના વિવિધ ભાગોમાં પથ સંચલન કર્યું હતું.

 * શસ્ત્રપૂજન: વિજયાદશમીના પર્વની પરંપરા જાળવતા આ ઉત્સવમાં સ્વયંસેવકો દ્વારા વિધિવત રીતે શસ્ત્રપૂજનનો કાર્યક્રમ પણ યોજાયો હતો.

 * પ્રાત્યક્ષિક: મહેમાનોની હાજરીમાં સ્વયંસેવકો દ્વારા અમૃતવચન, વ્યક્તિગત ગીત, સુભાષિત તેમજ યોગના અલગ-અલગ વ્યાયામનું પ્રાત્યક્ષિક (પ્રદર્શન) રજૂ કરવામાં આવ્યું હતું.

ભરૂચ જીલ્લાના 'ઉર્જા કેન્દ્ર' વેજલપુરનો ગૌરવશાળી ઇતિહાસ

કાર્યક્રમ દરમિયાન ભરૂચ જીલ્લા કાર્યવાહ શ્રી નિમેષભાઈ પટેલે પોતાનું બૌદ્ધિક (વક્તવ્ય) રજૂ કર્યું હતું. તેમણે વેજલપુર શાખાના યોગદાનને બિરદાવતા જણાવ્યું હતું કે, ભરૂચ જિલ્લાનો આ વિસ્તાર સંઘ કાર્ય માટે એક ઉર્જા કેન્દ્ર સમાન છે અને અહીંના અનેક હિન્દુ યુવકો સંઘ કાર્ય સાથે જોડાયેલા છે.

જીલ્લા પદાધિકારી શ્રી પ્રજ્ઞેશભાઈ મિસ્ત્રીએ વિશેષ અહેવાલ આપતા જણાવ્યું હતું કે:

 * જૂની શાખા: ભરૂચ શહેરમાં સૌપ્રથમ RSSની શાખા ૧૯૭૧ થી શરૂ થઈ હતી, જ્યારે વેજલપુરની પ્રભાત શાખા ૧૯૮૧ થી અવિરત કાર્યરત છે.

 * મહત્વપૂર્ણ પ્રવાસીઓ: શ્રી પંકજભાઈ વડવાલા, શ્રી વાસુદેવ તળવળકર, શ્રી અનંતરાવજી કાળે સહિત જિલ્લા પ્રચારક તરીકે કાર્યરત રહેલા અનેક વરિષ્ઠ આગેવાનોના પ્રવાસો વેજલપુર શાખામાં થયા છે.

 * સમર્પિત કાર્યકર્તાઓ: આ વિસ્તારમાંથી ત્રણ જેટલા સ્વયંસેવકોએ પ્રચારક તરીકે અન્ય જિલ્લાઓમાં પોતાનું યોગદાન આપ્યું છે. જ્યારે ઘણા કાર્યકર્તાઓએ વિસ્તારકની જવાબદારી નિભાવી સંઘના કાર્યને અન્ય વિસ્તારો સુધી પહોંચાડ્યો છે.

આ સમગ્ર કાર્યક્રમ ભરૂચ જિલ્લામાં RSSની સુવર્ણ જયંતી વર્ષની ઉજવણીમાં વેજલપુર શાખાના સમર્પણ અને સામાજિક સદભાવનાના સંદેશને ઉજાગર કરનારો બની રહ્યો હતો.

#gujaratniparchhai